Bu həftə Azərbaycan Premyer Liqasında 5-ci turun oyunları keçiriləcək. FutbolPlanet.Az xəbər verir ki, turun son günündə meydana çıxacaq “Qəbələ” Sumqayıtda eyniadlı komanda ilə qarşılaşacaq.

Sentyabrın 26-da keçiriləcək matç “Kapital Bank Arena”da təşkil olunacaq. Bu, “qırmızı-qaralar”ın “Sumqayıt”la 37-ci dueli kimi tarixə düşəcək. İndiyədək iki komanda arasında 36 qarşılaşma keçirilib. Əvvəlki oyunlarda "Qəbələ" böyük üstünlüyə malikdir. Aktivində 21 qələbə olan “Qəbələ” 10 heç-heçə edib və yalnız 5 dəfə uduzub. Bu üstünlük top fərqində də əksini tapıb – 57:27. “Qırmızı-qaralar”ın heyətində “Sumqayıt”a ən çox qol vuran futbolçu Viktor Mendidir. Onun hesabında 7 top var.

Premyer Liqa çərçivəsində keçirilən 35 görüşdə 20 dəfə üç xal qazanan “Qəbələ” 10 sülhə nail olub. “Sumqayıt” isə 5 dəfə qalib gəlib. Çempionatdakı top fərqi 56-27-dir. Səfər matçlarında da üstünlüyə malik olan “qırmızı-qaralar” rəqib meydanındakı 17 oyun 7 dəfə qalib gəlib. 6 qarşılaşma heç-heçə bitib. Digər 4 matçda meydan sahibləri üç xala seviniblər. Səfərdə 23 top vuran "Qəbələ" 17 top buraxıb.

Xatırladaq ki, sentyabrın 26-da keçiriləcək “Sumqayıt” - “Qəbələ” matçı saat 19:15-də başlayacaq.